అరెస్ట్ సమయంలో గంటన్నర సేపు తలుపులు తెరవని 'ఐబొమ్మ' రవి

సినిమా పైరసీ వెబ్ సైట్లు ఐబొమ్మ, బప్పం టీవీ నిర్వాహకుడు ఇమ్మడి రవి అరెస్ట్ కేసులో పోలీసుల దర్యాప్తులో విస్తుపోయే నిజాలు వెలుగులోకి వస్తున్నాయి. వెబ్ సైట్లలో బెట్టింగ్ యాడ్స్ ప్రదర్శించడం ద్వారా రవి కోట్లాది రూపాయలు ఆర్జించి విలాసవంతమైన జీవితం గడిపినట్టు పోలీసులు గుర్తించారు.

పోలీసుల విచారణలో భాగంగా రవికి చెందిన నాలుగు బ్యాంకు ఖాతాల్లో సుమారు రూ.20 కోట్ల లావాదేవీలు జరిగినట్టు తేలింది. ఇప్పటికే మూడు ఖాతాల్లోని రూ.3.5 కోట్ల నగదును అధికారులు స్తంభింపజేశారు. 'వన్‌ఎక్స్‌బెట్', 'వన్‌విన్' వంటి బెట్టింగ్ యాప్‌ల ప్రకటనల ద్వారా అతనికి భారీగా ఆదాయం సమకూరినట్టు తేలింది. కేవలం సినిమా పైరసీ ద్వారానే నెలకు రూ.11 లక్షల వరకు సంపాదించినట్టు గుర్తించారు.

ఈ అక్రమ సంపాదనతో రవి హైదరాబాద్‌తో పాటు కరీబియన్ దీవుల్లోనూ ఇళ్లు కొనుగోలు చేశాడు. విలాసవంతమైన జీవితానికి అలవాటుపడి, ప్రతి రెండు నెలలకు ఒక కొత్త దేశానికి పర్యటనకు వెళ్లేవాడని దర్యాప్తులో తేలింది. తనకు యూరోపియన్ దేశాలంటే ఇష్టమని రవి పోలీసులకు చెప్పాడు.

అరెస్టు చేయడానికి పోలీసులు వెళ్లినప్పుడు రవి గంటన్నర పాటు తలుపులు తీయలేదు. ఈ సమయంలో తన మొబైల్, టెలిగ్రామ్ డేటాను డిలీట్ చేసి, ల్యాప్‌టాప్‌ను బాత్రూమ్ రూఫ్‌లో, ఫోన్‌ను అల్మారాలో దాచిపెట్టి సాక్ష్యాలను ధ్వంసం చేసేందుకు ప్రయత్నించాడు. తనకు బంధువులు, స్నేహితులతో ఎలాంటి సంబంధాలు లేవని రవి పోలీసుల వద్ద పేర్కొన్నాడు.